ಬೆಂಗಳೂರು: ಪಕ್ಷದ ಶಿಸ್ತು ಉಲ್ಲಂಘಿಸುವವರ ವಿರುದ್ಧ ಕೆಪಿಸಿಸಿ ಅಧ್ಯಕ್ಷ ಹಾಗೂ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಹರಿತವಾದ ಚಾಟಿ ಬೀಸಿದ್ದಾರೆ. ಮತದಾರರ ಪಟ್ಟಿ ವಿಶೇಷ ಸಮಗ್ರ ಪರಿಷ್ಕರಣೆ (SIR) ಕುರಿತ ಪ್ರಮುಖ ಸಭೆಗೆ ಗೈರುಹಾಜರಾಗಿ ಬೇಜವಾಬ್ದಾರಿತನ ತೋರಿದ ಕೆಪಿಸಿಸಿ ಪದಾಧಿಕಾರಿಗಳನ್ನು ತಕ್ಷಣದಿಂದಲೇ ಜಾರಿಗೆ ಬರುವಂತೆ ಹುದ್ದೆಯಿಂದ ಕಿತ್ತೊಗೆಯುವ ಮೂಲಕ ಬಿಗ್ ಶಾಕ್ ನೀಡಿದ್ದಾರೆ.
ರಾಜ್ಯ ಕಾಂಗ್ರೆಸ್ ಉಸ್ತುವಾರಿ ರಣದೀಪ್ ಸಿಂಗ್ ಸುರ್ಜೇವಲಾ ಅವರ ಖಡಕ್ ಸೂಚನೆ ಬೆನ್ನಲ್ಲೇ ಈ ಬೃಹತ್ ಆಪರೇಷನ್ ನಡೆದಿದ್ದು, ಕೈ ಪಾಳಯದಲ್ಲಿ ಸಂಚಲನ ಸೃಷ್ಟಿಸಿದೆ.
ಯಾರಿಗೆಲ್ಲ ಸಿಕ್ಕಿತು ‘ಗೇಟ್ ಪಾಸ್’?
ಪಕ್ಷ ಸಂಘಟನೆಯ ಜವಾಬ್ದಾರಿಯನ್ನು ಅಲಕ್ಷಿಸಿದ ಆರೋಪದ ಮೇಲೆ ಮೂವರು ಕೆಪಿಸಿಸಿ ಉಪಾಧ್ಯಕ್ಷರು ಹಾಗೂ 29 ಪ್ರಧಾನ ಕಾರ್ಯದರ್ಶಿಗಳನ್ನು ಹುದ್ದೆಯಿಂದ ಕೈಬಿಡಲಾಗಿದೆ. ವಜಾಗೊಂಡವರ ಪಟ್ಟಿಯಲ್ಲಿ ರಾಜ್ಯ ರಾಜಕಾರಣದ ಪ್ರಮುಖ ಮುಖಗಳಿರುವುದು ವಿಶೇಷ:
- ನಿಕೇತ್ ರಾಜ್ ಮೌರ್ಯ (ಕೆಪಿಸಿಸಿ ವಕ್ತಾರ)
- ಭಾವನಾ ರಾಮಣ್ಣ (ನಟಿ ಹಾಗೂ ಕಾಂಗ್ರೆಸ್ ನಾಯಕಿ)
- ಸಿ.ಆರ್. ಮನೋಹರ್ (ಚಿತ್ರ ನಿರ್ಮಾಪಕ ಹಾಗೂ ನಾಯಕ)
- ಶಿವಮೂರ್ತಿ ನಾಯಕ್
- ಎಂ.ಸಿ. ವೇಣುಗೋಪಾಲ್
- ಷಣ್ಮುಖ ಶಿವಳ್ಳಿ
ವಜಾ ಕಾರ್ಯಾಚರಣೆಯ ಇನ್ಸೈಡ್ ಸ್ಟೋರಿ:
ಮೇ 24 ರಂದು ಬೆಂಗಳೂರಿನ ಹೊರವಲಯದಲ್ಲಿ ಮುಂಬರುವ ಸ್ಥಳೀಯ ಸಂಸ್ಥೆಗಳ ಚುನಾವಣೆ, ಜಿಬಿಎ ಮತ್ತು ಎಸ್ಐಆರ್ (SIR) ಪ್ರಕ್ರಿಯೆ ಕುರಿತು ಹಿರಿಯ ನಾಯಕರ ಉಪಸ್ಥಿತಿಯಲ್ಲಿ ಅತ್ಯಂತ ನಿರ್ಣಾಯಕ ಪೂರ್ವಭಾವಿ ಸಭೆ ಆಯೋಜಿಸಲಾಗಿತ್ತು. ಚುನಾವಣೆಗಳ ದೃಷ್ಟಿಯಿಂದ ತಳಮಟ್ಟದ ಕಾರ್ಯತಂತ್ರ ರೂಪಿಸಲು ಈ ಸಭೆ ಅತಿ ಮುಖ್ಯವಾಗಿತ್ತು.
ಆದರೆ, ಇಷ್ಟೊಂದು ಪ್ರಮುಖ ಸಭೆಗೆ ಹಲವು ಪದಾಧಿಕಾರಿಗಳು ಗೈರಾಗಿದ್ದನ್ನು ಎಐಸಿಸಿ ಪ್ರಧಾನ ಕಾರ್ಯದರ್ಶಿ ರಣದೀಪ್ ಸಿಂಗ್ ಸುರ್ಜೇವಲಾ ತೀವ್ರವಾಗಿ ಖಂಡಿಸಿದ್ದರು. “ಪಕ್ಷದ ಸಭೆಗಳನ್ನು ಹಗುರವಾಗಿ ಪರಿಗಣಿಸುವವರ ವಿರುದ್ಧ ದಾಕ್ಷಿಣ್ಯವಿಲ್ಲದೆ ಕ್ರಮ ಕೈಗೊಳ್ಳಿ” ಎಂದು ಅವರು ನೀಡಿದ ಗ್ರೀನ್ ಸಿಗ್ನಲ್ ಆಧರಿಸಿ, ಡಿ.ಕೆ. ಶಿವಕುಮಾರ್ ಗೈರಾದ ನಾಯಕರಿಗೆ ನೇರವಾಗಿ ಗೇಟ್ ಪಾಸ್ ನೀಡಿದ್ದಾರೆ.
ರಾಜಕೀಯ ವಲಯದಲ್ಲಿ ಚರ್ಚೆ:
“ಹುದ್ದೆ ಕೇವಲ ಪ್ರತಿಷ್ಠೆಗಲ್ಲ, ಕೆಲಸ ಮಾಡಲು” ಎಂಬ ಸಂದೇಶವನ್ನು ಈ ಕ್ರಮದ ಮೂಲಕ ಹೈಕಮಾಂಡ್ ರವಾನಿಸಿದೆ. ಚುನಾವಣೆಗಳು ಎದುರಿಗಿರುವಾಗ ನಾಯಕರ ಇಂತಹ ಅಲಕ್ಷ್ಯ ಧೋರಣೆಯನ್ನು ಸಹಿಸುವುದಿಲ್ಲ ಎಂಬ ಕಠಿಣ ನಿಲುವನ್ನು ಕೆಪಿಸಿಸಿ ತಳೆದಿದ್ದು, ಸದ್ಯ ಈ ದಿಢೀರ್ ವಜಾ ಪ್ರಕ್ರಿಯೆ ರಾಜ್ಯ ರಾಜಕಾರಣದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
