ರಾಯ್‌ಪುರ: ಭಾರತಕ್ಕೆ ಪ್ರಧಾನಿ ನರೇಂದ್ರ ಮೋದಿ ಅವರ ನಾಯಕತ್ವದ ಅಗತ್ಯ ‘ಈಗ ಹಿಂದೆಂದಿಗಿಂತಲೂ ಹೆಚ್ಚಾಗಿದೆ’ ಎಂದು ಬಿಜೆಪಿ ಸಂಸದೆ ಕಂಗನಾ ರಣಾವತ್ ಹೇಳಿದ್ದಾರೆ
ಫ್ರಾನ್ಸ್‌ನಲ್ಲಿ ಇತ್ತೀಚೆಗೆ ನಡೆದ ಘಟನೆಗಳನ್ನು ಪ್ರಸ್ತಾಪಿಸಿದ ರಣಾವತ್, ಅಲ್ಲಿನ ಹಿಂಸಾಚಾರ ಮತ್ತು ಅಶಾಂತಿಯ ಘಟನೆಗಳು, ಸದ್ಯದ ಜಾಗತಿಕ ಪರಿಸ್ಥಿತಿಯಲ್ಲಿ ಬಲವಾದ ನಾಯಕತ್ವದ ಮಹತ್ವವನ್ನು ಎತ್ತಿ ತೋರಿಸುತ್ತವೆ ಎಂದು ಹೇಳಿದರು. ‘ಆಡಳಿತ ಬದಲಾವಣೆ’ ಕುರಿತಾದ ವಿಪಕ್ಷಗಳ ಹೇಳಿಕೆಗಳನ್ನು ಟೀಕಿಸಿದರು.
ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ವಿರುದ್ಧ ನಡೆಯುತ್ತಿರುವ ಪ್ರತಿಭಟನೆಯನ್ನು ಹಿರಿಯ ವಕೀಲ ಪ್ರಶಾಂತ್ ಭೂಷಣ್ ಅವರು ‘ಆಡಳಿತ ಬದಲಾವಣೆಗಾಗಿನ ಹೋರಾಟ’ ಎಂದು ಬಣ್ಣಿಸಿದ ನಂತರ ಉಂಟಾಗಿರುವ ರಾಜಕೀಯ ವಿವಾದದ ನಡುವೆ ಕಂಗನಾ ಈ ಹೇಳಿಕೆ ನೀಡಿದ್ದಾರೆ.
ಆಲ್ ಇಂಡಿಯಾ ಸ್ಟೂಡೆಂಟ್ಸ್ ಅಸೋಸಿಯೇಷನ್ (AISA) ಅಧ್ಯಕ್ಷೆ ನೇಹಾ ಬೋರಾ, ಬಾಂಗ್ಲಾದೇಶದಲ್ಲಿ ‘ಜೆನ್ ಝೆಡ್’ ನೇತೃತ್ವದಲ್ಲಿ ನಡೆದ ಚಳುವಳಿಯನ್ನೂ ಉಲ್ಲೇಖಿಸಿದರು.
ಕೋಲ್ಕತ್ತಾದ ‘ಚೋರ್ಬಗಾನ್ ಸಾರ್ವಜನಿಕ ದುರ್ಗಾ ಪೂಜೆ’ ಪೆಂಡಾಲ್‌ನಲ್ಲಿ ಸಂಭವಿಸಿದ ನೂಕುನುಗ್ಗಲಿನ ಘಟನೆಯ ಬಗ್ಗೆ ದುಃಖ ವ್ಯಕ್ತಪಡಿಸಿದ ರಣಾವತ್, ಸಂತ್ರಸ್ತ ಕುಟುಂಬಗಳಿಗೆ ಸಂತಾಪ ಸೂಚಿಸಿದರು.
‘ಇದು ಅತ್ಯಂತ ದುಃಖಕರ ಘಟನೆ; ಅಲ್ಲಿ ನೂಕುನುಗ್ಗಲು ಉಂಟಾಗಿದೆ. ಎಲ್ಲೆಡೆ ಸಂಭ್ರಮಾಚರಣೆಯ ವಾತಾವರಣವಿರುವ, ಇಂತಹ ಹಬ್ಬದ ಸಮಯದಲ್ಲಿ, ಅನೇಕರು ದುಃಖದಲ್ಲಿ ಮುಳುಗಿರುವುದು ಎದೆ ಕಲಕುವ ಸಂಗತಿಯಾಗಿದೆ. ಸಂತ್ರಸ್ತ ಕುಟುಂಬಗಳಿಗೆ ನಾವು ನಮ್ಮ ತೀವ್ರ ಸಂತಾಪ ವ್ಯಕ್ತಪಡಿಸುತ್ತೇವೆ. ಹೆಚ್ಚು ಜನಸಂದಣಿ ಇರುವ ಸ್ಥಳಗಳಿಗೆ ಹೋಗುವುದನ್ನು ತಪ್ಪಿಸುವಂತೆ ನಾನು ಎಲ್ಲರಿಗೂ ವಿನಂತಿಸುತ್ತೇನೆ. ದಸರಾ ಮತ್ತು ದೀಪಾವಳಿಯಂತಹ ಹಬ್ಬಗಳು ಹತ್ತಿರ ಬರುತ್ತಿವೆ’ ಎಂದು ಅವರು ಹೇಳಿದರು.
ಇದೇ ವೇಳೆ, ಪಶ್ಚಿಮ ಬಂಗಾಳದ ಸಚಿವ ಉಮೇಶ್ ರೈ, ಈ ನೂಕುನುಗ್ಗಲು ಘಟನೆಯ ತನಿಖೆಗಾಗಿ ರಾಜ್ಯ ಸರ್ಕಾರವು ವಿಶೇಷ ತನಿಖಾ ತಂಡವನ್ನು (SIT) ರಚಿಸಿದೆ ಎಂದು ತಿಳಿಸಿದರು. ಅವರು ಈ ಘಟನೆಯನ್ನು ‘ಅವ್ಯವಸ್ಥೆ’ ಎಂದು ಬಣ್ಣಿಸಿದರು.
‘ಇಂತಹ ನೀಚ ಕೃತ್ಯಗಳು, ಬಲವಾದ ನಾಯಕತ್ವದ ಅಗತ್ಯವಿದೆಯೆಂಬುದನ್ನು ರಾಷ್ಟ್ರಕ್ಕೆ ನಿರಂತರವಾಗಿ ನೆನಪಿಸುತ್ತವೆ. ನಿನ್ನೆ ರಾತ್ರಿ ಫ್ರಾನ್ಸ್‌ನಲ್ಲಿ ಏನಾಯಿತು ಎಂಬುದನ್ನು ನೀವು ನೋಡಿದ್ದೀರಿ; ಐತಿಹಾಸಿಕ ಕಟ್ಟಡಗಳಿಂದ ಹಿಡಿದು ಅಂಗಡಿಗಳವರೆಗೆ ಎಲ್ಲವನ್ನೂ ಸುಟ್ಟುಹಾಕಲಾಯಿತು ಮತ್ತು ಲೂಟಿ ಮಾಡಲಾಯಿತು ಎಂದರು.
ಜನರು ಇದನ್ನೆಲ್ಲ ಕಣ್ಣಾರೆ ಕಾಣುತ್ತಿದ್ದಾರೆ. ಮೂರನೇ ಮಹಾಯುದ್ಧದ ಛಾಯೆಯನ್ನು ನೆನಪಿಸುವ ಇಂದಿನ ಪರಿಸ್ಥಿತಿಯಲ್ಲಿ, ವಿರೋಧ ಪಕ್ಷದ ನಡೆಗಳು ಭಾರತಕ್ಕೆ ಏಕೆ ಬಲವಾದ ನಾಯಕತ್ವದ ಅಗತ್ಯವಿದೆ ಎಂಬುದನ್ನು ಎತ್ತಿ ತೋರಿಸುತ್ತವೆ. ಹಾಗೆಯೇ, ನಮಗೆ ಈಗ ಪ್ರಧಾನಿ ನರೇಂದ್ರ ಮೋದಿ ಅವರ ಅಗತ್ಯ ಹಿಂದೆಂದಿಗಿಂತಲೂ ಹೆಚ್ಚಾಗಿದೆ ಎಂಬುದನ್ನು ಇದು ಸ್ಪಷ್ಟಪಡಿಸುತ್ತದೆ’ ಎಂದು ಹೇಳಿದರು.
