ಬೆಂಗಳೂರು: ರಾಜ್ಯದ ಸಾರಿಗೆ ಸಂಸ್ಥೆಗಳಾದ ಕೆಎಸ್‌ಆರ್‌ಟಿಸಿ (KSRTC), ಬಿಎಂಟಿಸಿ (BMTC), ವಾಕರಸಾಸಂ (NWKRTC) ಹಾಗೂ ಕಕರಸಾನಿ (KKRTC) ಬಸ್‌ಗಳ ಪ್ರಯಾಣ ದರವನ್ನು ಹೆಚ್ಚಿಸಲಾಗಿದ್ದು, ಪರಿಷ್ಕೃತ ದರವು ದಿನಾಂಕ 04-05 ನವೆಂಬರ್ 2026ರ ಮಧ್ಯರಾತ್ರಿಯಿಂದಲೇ ಜಾರಿಗೆ ಬಂದಿದೆ. ಡೀಸೆಲ್ ದರ ಏರಿಕೆ, ಸಿಬ್ಬಂದಿ ವೆಚ್ಚ ಹಾಗೂ ಸಂಸ್ಥೆಗಳ ಮೇಲಿನ ಆರ್ಥಿಕ ಹೊರೆಯ ಹಿನ್ನೆಲೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಸಾರಿಗೆ ಸಂಸ್ಥೆಗಳು ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿವೆ.
ದರ ಏರಿಕೆಗೆ ಕಾರಣಗಳು:
- ಇಂಧನ ಮತ್ತು ಸಿಬ್ಬಂದಿ ವೆಚ್ಚ: ಸಾರಿಗೆ ಸಂಸ್ಥೆಗಳ ಒಟ್ಟು ವೆಚ್ಚದಲ್ಲಿ ಶೇಕಡಾ 80ರಷ್ಟು ಹಣ ಡೀಸೆಲ್ ಹಾಗೂ ಸಿಬ್ಬಂದಿ ವೆಚ್ಚಕ್ಕೆ ಬಳಕೆಯಾಗುತ್ತಿದೆ. ಪ್ರಸ್ತುತ ಡೀಸೆಲ್ ದರ ಸರಾಸರಿ ಪ್ರತಿ ಲೀಟರ್‌ಗೆ ₹98.13 ತಲುಪಿದ್ದು, ಪ್ರಸಕ್ತ ಸಾಲಿನಲ್ಲಿಯೇ ಲೀಟರ್‌ಗೆ ₹10.47 ರಷ್ಟು ಏರಿಕೆಯಾಗಿದೆ. ಪ್ರತಿದಿನ ಸುಮಾರು ₹15.60 ಕೋಟಿ (ವರ್ಷಕ್ಕೆ ₹5,694 ಕೋಟಿ) ಇಂಧನಕ್ಕಾಗಿ ವೆಚ್ಚವಾಗುತ್ತಿದೆ.
- ಸಂಚಿತ ನಷ್ಟ ಮತ್ತು ಆರ್ಥಿಕ ಹೊರೆ: ನಾಲ್ಕೂ ನಿಗಮಗಳು ಒಟ್ಟಾರೆಯಾಗಿ ಸುಮಾರು ₹10,200 ಕೋಟಿ ಸಂಚಿತ ನಷ್ಟ ಹೊಂದಿವೆ. ಇಂಧನ ಬಾಕಿ ಮೊತ್ತ ₹1,111.88 ಕೋಟಿ ಸೇರಿದಂತೆ ಒಟ್ಟು ಬಾಕಿ ಮತ್ತು ಹೊಣೆಗಾರಿಕೆಗಳು ₹9,912.10 ಕೋಟಿಗಳಿಗೆ ತಲುಪಿವೆ. ಇದರಲ್ಲಿ ನೌಕರರ ಭವಿಷ್ಯ ನಿಧಿ, ನಿವೃತ್ತಿ ವೇತನ ಮತ್ತು ಬಾಕಿ ವೇತನದ ಮೊತ್ತವೂ ಸೇರಿದೆ.
- ದರ ನಿಯಂತ್ರಣ ಸಮಿತಿ ಶಿಫಾರಸು: ನಿವೃತ್ತ ಐಎಎಸ್ ಅಧಿಕಾರಿ ಎಂ.ಆರ್. ಶ್ರೀನಿವಾಸ ಮೂರ್ತಿ ಸಮಿತಿಯ ಶಿಫಾರಸಿನಂತೆ ರಚಿಸಲಾದ ‘ಸಾರ್ವಜನಿಕ ಸಾರಿಗೆ ದರ ನಿಯಂತ್ರಣ ಸಮಿತಿ’ಯು ನೀಡಿದ ವರದಿಯ ಅನ್ವಯ ಈ ಪರಿಷ್ಕರಣೆ ಮಾಡಲಾಗಿದೆ.
ಪ್ರಮುಖ ಮಾರ್ಗಗಳ ಪರಿಷ್ಕೃತ ದರಗಳ ವಿವರ
1. ಕೆಎಸ್‌ಆರ್‌ಟಿಸಿ ಸಾಮಾನ್ಯ ಸಾರಿಗೆ (ಬೆಂಗಳೂರಿನಿಂದ):
ಸಾಮಾನ್ಯ ಸಾರಿಗೆಗಳಲ್ಲಿ ಮೊದಲ ಐದು ಹಂತಗಳ ಪ್ರಯಾಣಕ್ಕೆ ಗರಿಷ್ಠ ₹9 ಹೆಚ್ಚಳವಾಗಲಿದೆ.
- ನೆಲಮಂಗಲ: ₹35 ರಿಂದ ₹44
- ಹೊಸಕೋಟೆ: ₹35 ರಿಂದ ₹44
- ದೊಡ್ಡಬಳ್ಳಾಪುರ: ₹38 ರಿಂದ ₹47
- ಆನೇಕಲ್: ₹38 ರಿಂದ ₹47
- ಮಾಗಡಿ: ₹46 ರಿಂದ ₹57
- ಮಾಲೂರು: ₹46 ರಿಂದ ₹57
ಕೆಎಸ್‌ಆರ್‌ಟಿಸಿ ವೇಗದೂತ ಸಾರಿಗೆ (ಬೆಂಗಳೂರಿನಿಂದ):
ವೇಗದೂತ ಸಾರಿಗೆಗಳಲ್ಲಿ ಮೊದಲ 10 ಹಂತಗಳ ಪ್ರಯಾಣಕ್ಕೆ ಗರಿಷ್ಠ ₹18 ಹೆಚ್ಚಳವಾಗಲಿದೆ.
- ಕೋಲಾರ / ತುಮಕೂರು: ₹81 ರಿಂದ ₹100
- ಮಂಡ್ಯ: ₹110 ರಿಂದ ₹136
- ಮೈಸೂರು: ₹160 ರಿಂದ ₹197
- ಹಾಸನ: ₹219 ರಿಂದ ₹270
- ಚಿಕ್ಕಮಗಳೂರು: ₹295 ರಿಂದ ₹363
- ದಾವಣಗೆರೆ: ₹317 ರಿಂದ ₹390
- ಶಿವಮೊಗ್ಗ: ₹340 ರಿಂದ ₹419
- ಮಂಗಳೂರು: ₹423 ರಿಂದ ₹521
- ಹುಬ್ಬಳ್ಳಿ: ₹490 ರಿಂದ ₹613
- ಬೆಳಗಾವಿ: ₹603 ರಿಂದ ₹742
- ಕಲಬುರಗಿ: ₹754 ರಿಂದ ₹928
ಬಿಎಂಟಿಸಿ ಪರಿಷ್ಕೃತ ದರಗಳ ವಿವರ
ಸಾಮಾನ್ಯ ಬಸ್ ಸೇವೆಗಳು:
- 2 ಕಿ.ಮೀ. ವರೆಗಿನ ಪ್ರಯಾಣಕ್ಕೆ ₹4 ಹೆಚ್ಚಳ.
- 2 ರಿಂದ 4 ಕಿ.ಮೀ. ವರೆಗಿನ ಪ್ರಯಾಣಕ್ಕೆ ₹6 ಹೆಚ್ಚಳ.
- ದೂರದ ಪ್ರಯಾಣಕ್ಕೆ ಗರಿಷ್ಠ ₹12 ಹೆಚ್ಚಳ.
- ಉದಾಹರಣೆಗೆ: ಕೆಂಪೇಗೌಡ ಬಸ್ ನಿಲ್ದಾಣದಿಂದ (ಮೆಜೆಸ್ಟಿಕ್) ಶಿವಾಜಿನಗರಕ್ಕೆ ₹12 ರಿಂದ ₹18, ಯಶವಂತಪುರ ಹಾಗೂ ವಿಜಯನಗರಕ್ಕೆ ₹18 ರಿಂದ ₹25, ಬನಶಂಕರಿಗೆ ₹23 ರಿಂದ ₹35 ಮತ್ತು ಕಾಡುಗೋಡಿಗೆ ₹30 ರಿಂದ ₹40 ಕ್ಕೆ ಏರಿಕೆಯಾಗಿದೆ.
ವಜ್ರ (ಎಸಿ) ಸೇವೆಗಳು:
- 6 ಕಿ.ಮೀ. ವರೆಗಿನ ಪ್ರಯಾಣಕ್ಕೆ ₹5 ಹೆಚ್ಚಳ.
- 6 ರಿಂದ 18 ಕಿ.ಮೀ. ವರೆಗಿನ ಪ್ರಯಾಣಕ್ಕೆ ₹10 ಹೆಚ್ಚಳ.
- ದೂರದ ಪ್ರಯಾಣಕ್ಕೆ ಗರಿಷ್ಠ ₹15 ಹೆಚ್ಚಳ.
- ಉದಾಹರಣೆಗೆ: ಸೆಂಟ್ರಲ್ ಸಿಲ್ಕ್ ಬೋರ್ಡ್‌ನಿಂದ ಹೆಬ್ಬಾಳಕ್ಕೆ ₹55 ರಿಂದ ₹65 ಹಾಗೂ ಮೆಜೆಸ್ಟಿಕ್‌ನಿಂದ ಅತ್ತಿಬೆಲೆಗೆ ₹60 ರಿಂದ ₹70 ಕ್ಕೆ ನಿಗದಿಯಾಗಿದೆ.
ರಾಜ್ಯದ ಜೀವನಾಡಿಯಾಗಿರುವ ಸಾರಿಗೆ ಸಂಸ್ಥೆಗಳನ್ನು ಆರ್ಥಿಕ ಬಿಕ್ಕಟ್ಟಿನಿಂದ ಪಾರು ಮಾಡಲು ಮತ್ತು ಉತ್ತಮ ಸೌಲಭ್ಯಗಳನ್ನು ಮುಂದುವರಿಸಲು ಈ ದರ ಏರಿಕೆ ಅನಿವಾರ್ಯವಾಗಿದ್ದು, ಸಾರ್ವಜನಿಕರು ಸಹಕರಿಸಬೇಕೆಂದು ಸಂಸ್ಥೆಗಳು ಮನವಿ ಮಾಡಿದೆ.
