ಬೆಂಗಳೂರು: ಇಂದಿನ ಯುವ ಪೀಳಿಗೆಯ ನಾಲಿಗೆಗೆ ಲಕಲಕನೆ ರುಚಿ ನೀಡುವ ಅತ್ಯಂತ ಜನಪ್ರಿಯ ಫಾಸ್ಟ್ಫುಡ್ಗಳಲ್ಲಿ ‘ಶವರ್ಮಾ’ ಮುಂಚೂಣಿಯಲ್ಲಿದೆ. ಆದರೆ, ಇದೀಗ ಇದೇ ಶವರ್ಮಾ ಜನರ ಜೀವಕ್ಕೆ ಕಂಟಕವಾಗುತ್ತಿದೆಯೇ ಎಂಬ ಅನುಮಾನ ಮೂಡಿದೆ. ರಾಜ್ಯದ ವಿವಿಧ ಹೋಟೆಲ್ಗಳಿಂದ ಆಹಾರ ಸುರಕ್ಷತಾ ಇಲಾಖೆಯು ಜಪ್ತಿ ಮಾಡಿದ್ದ ಶವರ್ಮಾ ಮಾದರಿಗಳ ಪ್ರಯೋಗಾಲಯ ವರದಿಯು ಸಾರ್ವಜನಿಕರನ್ನು ಆತಂಕದ ಸುಳಿಗೆ ದೂಡಿದೆ. ಪರೀಕ್ಷೆಗೆ ಒಳಪಡಿಸಲಾಗಿದ್ದ 32 ಮಾದರಿಗಳ ಪೈಕಿ ಕೆಲವು ಸ್ಯಾಂಪಲ್ಗಳಲ್ಲಿ ಕ್ಯಾನ್ಸರ್ ರೋಗಕ್ಕೆ ಕಾರಣವಾಗಬಲ್ಲ ಮಾರಕ ‘ಕಾರ್ಸಿನೋಜೆನಿಕ್’ ಎಂಬ ರಾಸಾಯನಿಕ ಅಂಶಗಳು ಪತ್ತೆಯಾಗಿರುವುದು ದೃಢಪಟ್ಟಿದೆ.
ಆಕರ್ಷಕ ಬಣ್ಣದ ಹಿಂದಿರುವ ಕರಾಳ ಸತ್ಯ ಸಾಮಾನ್ಯವಾಗಿ ಹೋಟೆಲ್ಗಳಲ್ಲಿ ಗ್ರಾಹಕರನ್ನು ಸೆಳೆಯಲು ಶವರ್ಮಾಗೆ ಕಣ್ಣು ಕೋರೈಸುವ ಕೃತಕ ಬಣ್ಣಗಳನ್ನು ಹಾಗೂ ಅತಿಯಾದ ಮಸಾಲೆಗಳನ್ನು ಬೆರೆಸಲಾಗುತ್ತದೆ. ಈ ಕೃತಕ ಬಣ್ಣಗಳ ಬಳಕೆಯೇ ಇಂದು ದೊಡ್ಡ ಕಂಟಕವಾಗಿ ಪರಿಣಮಿಸಿದೆ. ಈ ಬಗ್ಗೆ ಎಚ್ಚರಿಕೆ ನೀಡಿರುವ ಆಹಾರ ತಜ್ಞರಾದ ಕೀರ್ತಿ ಕಿರಿಸಾವೆ ಅವರು, ಕೃತಕ ಬಣ್ಣ ಹಾಗೂ ರಾಸಾಯನಿಕ ಯುಕ್ತ ಆಹಾರಗಳನ್ನು ಸಾರ್ವಜನಿಕರು ನಿರಂತರವಾಗಿ ತಿನ್ನುವುದರಿಂದ ದೇಹದಲ್ಲಿ ರೋಗನಿರೋಧಕ ಶಕ್ತಿ ಕುಂದುತ್ತದೆ. ಅಷ್ಟೇ ಅಲ್ಲದೆ, ಇದು ದೀರ್ಘಕಾಲದಲ್ಲಿ ಕ್ಯಾನ್ಸರ್ ಹಾಗೂ ಹೃದಯ ಸಂಬಂಧಿ ಮಾರಕ ಕಾಯಿಲೆಗಳಿಗೆ ನೇರ ಹಾದಿ ಮಾಡಿಕೊಡುತ್ತದೆ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.
ಬ್ಯಾಕ್ಟೀರಿಯಾಗಳ ತಾಣವಾಗುವ ಮಾಂಸ ಮತ್ತು ವಿಷಬಾಧೆ ಇತ್ತೀಚಿನ ದಿನಗಳಲ್ಲಿ ಶವರ್ಮಾ ತಿಂದ ಹಲವರು ತೀವ್ರ ಅಸ್ವಸ್ಥರಾಗುತ್ತಿರುವ ಪ್ರಕರಣಗಳು ಹೆಚ್ಚುತ್ತಿವೆ. ಇದಕ್ಕೆ ಮುಖ್ಯ ಕಾರಣ ತಯಾರಿಕೆಯಲ್ಲಿ ತೋರುವ ಬೇಜವಾಬ್ದಾರಿತನ ಮತ್ತು ಅಸ್ವಚ್ಛತೆ. ತಜ್ಞರ ವಿಶ್ಲೇಷಣೆಯ ಪ್ರಕಾರ, ಮಳಿಗೆಗಳಲ್ಲಿ ಮಾಂಸವನ್ನು ಸೂಕ್ತ ತಾಪಮಾನದಲ್ಲಿ ಬೇಯಿಸದೇ ಇರುವುದು, ದಿನಗಟ್ಟಲೆ ಹಳೆಯ ಮಾಂಸವನ್ನು ರೆಫ್ರಿಜರೇಟರ್ನಲ್ಲಿ ಇಟ್ಟು ಬಳಸುವುದು ಹಾಗೂ ತಯಾರಿಕಾ ಸ್ಥಳದಲ್ಲಿ ಸ್ವಚ್ಛತೆ ಇಲ್ಲದಿರುವುದರಿಂದ ಅದರಲ್ಲಿ ಬ್ಯಾಕ್ಟೀರಿಯಾಗಳು ಅತಿ ವೇಗವಾಗಿ ಬೆಳೆಯುತ್ತವೆ. ಇಂತಹ ಬ್ಯಾಕ್ಟೀರಿಯಾ ಯುಕ್ತ ಮಾಂಸವನ್ನು ಸೇವಿಸಿದಾಗ ಅದು ನೇರವಾಗಿ ‘ಆಹಾರ ವಿಷಬಾಧೆ’ಗೆ (ಫುಡ್ ಪಾಯ್ಸನಿಂಗ್) ಕಾರಣವಾಗುತ್ತದೆ.
ಕಿಡಿಗೇಡಿ ವ್ಯಾಪಾರಿಗಳ ವಿರುದ್ಧ ಇಲಾಖೆಯ ಕಾನೂನು ಸಮರ ಈ ಆಘಾತಕಾರಿ ವರದಿ ಪ್ರಕಟವಾಗುತ್ತಿದ್ದಂತೆ ಆಹಾರ ಸುರಕ್ಷತಾ ಇಲಾಖೆಯು ಕಟ್ಟುನಿಟ್ಟಿನ ಕ್ರಮಕ್ಕೆ ಮುಂದಾಗಿದೆ. ಸಾರ್ವಜನಿಕರ ಜೀವದ ಜೊತೆ ಆಟವಾಡುತ್ತಿರುವ ಮತ್ತು ಕಾಯ್ದೆಗಳನ್ನು ಉಲ್ಲಂಘಿಸಿ ಶವರ್ಮಾ ತಯಾರಿಸುತ್ತಿರುವ ಹೋಟೆಲ್ ಮಾಲೀಕರ ವಿರುದ್ಧ ಕ್ರಿಮಿನಲ್ ಮೊಕದ್ದಮೆ ಹೂಡಲು ಇಲಾಖೆ ಸಜ್ಜಾಗಿದೆ. ವ್ಯಾಪಾರಕ್ಕಿಂತ ಗ್ರಾಹಕರ ಆರೋಗ್ಯವೇ ಮುಖ್ಯವಾಗಿದ್ದು, ಕೇವಲ ಗುಣಮಟ್ಟದ ಆಹಾರವನ್ನಷ್ಟೇ ಮಾರಾಟ ಮಾಡಬೇಕು ಎಂದು ಕಟ್ಟುನಿಟ್ಟಿನ ಆದೇಶ ಹೊರಡಿಸಲಾಗಿದೆ.
ಸುರಕ್ಷಿತವಾಗಿರಲು ಗ್ರಾಹಕರು ಏನು ಮಾಡಬೇಕು? ಇಂತಹ ಸಂದರ್ಭದಲ್ಲಿ ಸಾರ್ವಜನಿಕರು ಕೂಡ ತಮ್ಮ ಆಹಾರ ಪದ್ಧತಿಯ ಬಗ್ಗೆ ಸ್ವಯಂ ಜಾಗೃತಿ ವಹಿಸುವುದು ಅನಿವಾರ್ಯವಾಗಿದೆ. ಅತಿಯಾದ ಕೆಂಪು ಅಥವಾ ಗಾಢ ಕಿತ್ತಳೆ ಬಣ್ಣವಿರುವ ಶವರ್ಮಾಗಳನ್ನು ತಿನ್ನುವುದನ್ನು ಸಂಪೂರ್ಣವಾಗಿ ನಿಲ್ಲಿಸಬೇಕು. ಕಡ್ಡಾಯವಾಗಿ ಎಫ್ಎಸ್ಎಸ್ಎಐ (FSSAI) ಪರವಾನಗಿ ಪಡೆದಿರುವ ಹಾಗೂ ಅತ್ಯಂತ ಸ್ವಚ್ಛವಾಗಿರುವ ಹೋಟೆಲ್ಗಳನ್ನು ಮಾತ್ರ ಆಯ್ಕೆ ಮಾಡಿಕೊಳ್ಳಬೇಕು. ಆಹಾರದ ರುಚಿ ಅಥವಾ ವಾಸನೆಯಲ್ಲಿ ಕೊಂಚ ಬದಲಾವಣೆ ಕಂಡುಬಂದರೂ ಅದನ್ನು ತಿನ್ನಬಾರದು. ಒಂದು ವೇಳೆ ಶವರ್ಮಾ ತಿಂದ ಬಳಿಕ ವಾಂತಿ, ಅತಿಸಾರ ಅಥವಾ ಹೊಟ್ಟೆನೋವಿನಂತಹ ಯಾವುದೇ ಲಕ್ಷಣಗಳು ಕಾಣಿಸಿಕೊಂಡರೆ ಸ್ವಯಂ ಚಿಕಿತ್ಸೆ ಮಾಡಿಕೊಳ್ಳದೆ ತಕ್ಷಣವೇ ವೈದ್ಯರನ್ನು ಭೇಟಿಯಾಗುವುದು ಉತ್ತಮ ಎಂದು ಆರೋಗ್ಯ ತಜ್ಞರು ಸಲಹೆ ನೀಡಿದ್ದಾರೆ.
