ನವದೆಹಲಿ: ದೇಶದಲ್ಲಿ ಗೃಹಬಳಕೆಯ ಅಡುಗೆ ಅನಿಲ ಸಬ್ಸಿಡಿ ವಿತರಣೆಯನ್ನು ಸಂಪೂರ್ಣ ಪಾರದರ್ಶಕಗೊಳಿಸಲು ಹಾಗೂ ಅನರ್ಹ ಫಲಾನುಭವಿಗಳನ್ನು ಹೊರಗಿಡಲು ಕೇಂದ್ರ ಸರ್ಕಾರ ಮಹತ್ವದ ಹೆಜ್ಜೆಯಿಟ್ಟಿದೆ. ನಿಯಂತ್ರಿತ ಚಿಲ್ಲರೆ ಮಾರಾಟ ದರದಲ್ಲಿ (RSP) ಸಬ್ಸಿಡಿ ಸಹಿತ ಸಿಲಿಂಡರ್ ಪಡೆಯುವ ಪ್ರತಿಯೊಬ್ಬ ಗ್ರಾಹಕರಿಗೂ 2026ರ ಅಕ್ಟೋಬರ್ 1 ರಿಂದ ಬಯೋಮೆಟ್ರಿಕ್ ಆಧಾರ್ ದೃಢೀಕರಣವನ್ನು (BAA) ಕಡ್ಡಾಯಗೊಳಿಸಲಾಗಿದೆ. ವಾಣಿಜ್ಯ ಉದ್ದೇಶಗಳಿಗೆ ಸಿಲಿಂಡರ್ಗಳ ಅಕ್ರಮ ವರ್ಗಾವಣೆ, ನಕಲಿ ಗ್ಯಾಸ್ ಸಂಪರ್ಕಗಳ ಹಾವಳಿ ತಪ್ಪಿಸಿ, ಸರ್ಕಾರದ ಸಬ್ಸಿಡಿ ಹಣವು ನೇರವಾಗಿ ಅರ್ಹ ಕುಟುಂಬಗಳಿಗೆ ಮಾತ್ರ ತಲುಪುವಂತೆ ಮಾಡುವುದು ಈ ನಿರ್ಧಾರದ ಮುಖ್ಯ ಗುರಿಯಾಗಿದೆ.
ಶೇಕಡಾ 90 ರಷ್ಟು ಗ್ರಾಹಕರ ಪರಿಶೀಲನೆ ಪೂರ್ಣ
2026ರ ಸೆಪ್ಟೆಂಬರ್ 19 ರ ವರೆಗಿನ ಅಧಿಕೃತ ಅಂಕಿ-ಅಂಶಗಳ ಪ್ರಕಾರ, ಒಟ್ಟು ಸಕ್ರಿಯ ಗ್ರಾಹಕರ ಪೈಕಿ ಶೇಕಡಾ 89.9 ರಷ್ಟು ಅಂದರೆ ಬರೋಬ್ಬರಿ 27.43 ಕೋಟಿ ಬಳಕೆದಾರರು ಈಗಾಗಲೇ ತಮ್ಮ ಬಯೋಮೆಟ್ರಿಕ್ ಇ-ಕೆವೈಸಿ ಪ್ರಕ್ರಿಯೆಯನ್ನು ಯಶಸ್ವಿಯಾಗಿ ಮುಗಿಸಿದ್ದಾರೆ. ಈವರೆಗೆ ಪರಿಶೀಲನೆ ಪೂರೈಸಿರುವ ಗ್ರಾಹಕರು ಯಾವುದೇ ಆತಂಕ ಪಡುವ ಅಗತ್ಯವಿಲ್ಲ ಹಾಗೂ ಅವರಿಗೆ ಸಿಲಿಂಡರ್ ವಿತರಣೆಯಲ್ಲಿ ಯಾವುದೇ ಅಡೆತಡೆ ಉಂಟಾಗುವುದಿಲ್ಲ. ಆದರೆ, ಇನ್ನೂ ಈ ಪ್ರಕ್ರಿಯೆ ಮುಗಿಸದ ಗ್ರಾಹಕರಿಗೆ ಅಕ್ಟೋಬರ್ 1 ರ ನಂತರ ಸಬ್ಸಿಡಿ ದರದ ಸಿಲಿಂಡರ್ ಬುಕಿಂಗ್ ಅನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗುತ್ತದೆ. ಅಂತಹ ಗ್ರಾಹಕರು ಬಯೋಮೆಟ್ರಿಕ್ ಪರಿಶೀಲನೆ ಮಾಡಿಸಿದ ತಕ್ಷಣವೇ ಈ ಸೌಲಭ್ಯ ಮರಳಿ ಸಿಗಲಿದೆ.
ಪರಿಶೀಲನೆ ಪೂರ್ಣಗೊಳಿಸಲು ಹಲವು ಸುಲಭ ಆಯ್ಕೆಗಳು
ಗ್ರಾಹಕರಿಗೆ ತೊಂದರೆಯಾಗದಂತೆ ತೈಲ ಕಂಪನಿಗಳು ಮತ್ತು ಪೆಟ್ರೋಲಿಯಂ ಸಚಿವಾಲಯವು ಮೂರು ಪ್ರಮುಖ ಮಾರ್ಗಗಳನ್ನು ಒದಗಿಸಿವೆ. ಸಿಲಿಂಡರ್ ಮನೆಗೆ ತಲುಪಿಸುವ ಡೆಲಿವರಿ ಸಿಬ್ಬಂದಿಯೇ ತಮ್ಮಲ್ಲಿರುವ ಮೊಬೈಲ್ ಆ್ಯಪ್ ಮೂಲಕ ಸ್ಥಳದಲ್ಲೇ ಬಯೋಮೆಟ್ರಿಕ್ ಮಾಡಿಕೊಡಲಿದ್ದಾರೆ. ಇದರ ಹೊರತಾಗಿ, ಗ್ರಾಹಕರು ಹತ್ತಿರದ ಗ್ಯಾಸ್ ವಿತರಕರ ಕಚೇರಿಗೆ ತೆರಳಿ ಖುದ್ದಾಗಿ ಪರಿಶೀಲಿಸಿಕೊಳ್ಳಬಹುದು. ತಾವೇ ಸ್ವತಃ ಮನೆಯಲ್ಲೇ ಮೊಬೈಲ್ ಮೂಲಕ ಮುಗಿಸಲು ಬಯಸುವವರು ಇಂಡೇನ್ ಗ್ರಾಹಕರಾಗಿದ್ದರೆ ‘IndianOil ONE’, ಭಾರತ್ ಗ್ಯಾಸ್ ಬಳಕೆದಾರರಾಗಿದ್ದರೆ ‘HelloBPCL’ ಹಾಗೂ ಎಚ್ಪಿ ಗ್ಯಾಸ್ ಬಳಕೆದಾರರಾಗಿದ್ದರೆ ‘HP PAY’ ಆ್ಯಪ್ಗಳನ್ನು ಡೌನ್ಲೋಡ್ ಮಾಡಿಕೊಂಡು ಸೆಲ್ಫ್ ಇ-ಕೆವೈಸಿ ಮಾಡಿಕೊಳ್ಳಬಹುದು. ಈ ಡಿಜಿಟಲ್ ವಿಧಾನದ ಕುರಿತು ಜನರಿಗೆ ತಿಳಿವಳಿಕೆ ನೀಡಲು ಪ್ರಧಾನಮಂತ್ರಿ ಉಜ್ವಲ ಯೋಜನೆಯ (PMUY) ವೆಬ್ ಪೋರ್ಟಲ್ನಲ್ಲಿ ಮಾರ್ಗದರ್ಶಿ ವಿಡಿಯೋಗಳನ್ನು ಪ್ರಕಟಿಸಲಾಗಿದೆ.
ದೃಢೀಕರಣ ಮಾಡದವರಿಗೆ ಮಾರುಕಟ್ಟೆ ದರದಲ್ಲಿ ಸಿಲಿಂಡರ್
ಯಾವುದೇ ಕಾರಣಕ್ಕೂ ಬಯೋಮೆಟ್ರಿಕ್ ಮಾಡಿಸಲು ಸಾಧ್ಯವಾಗದ ಅಥವಾ ಇಷ್ಟಪಡದ ಗ್ರಾಹಕರಿಗೂ ಅಡುಗೆ ಅನಿಲ ಸಂಪರ್ಕ ಮುಂದುವರಿಯಲಿದೆ. ಆದರೆ, ಅಂತಹವರು ತೈಲ ಕಂಪನಿಗಳ ಆನ್ಲೈನ್ ಪೋರ್ಟಲ್, ಮೊಬೈಲ್ ಅಪ್ಲಿಕೇಶನ್, ವಾಟ್ಸಾಪ್ ಚಾಟ್ಬಾಟ್ ಅಥವಾ ಐವಿಆರ್ಎಸ್ (IVRS) ಮುಖಾಂತರ ತಮ್ಮ ಸಮ್ಮತಿಯನ್ನು ದಾಖಲಿಸಬೇಕಾಗುತ್ತದೆ. ಇಂತಹ ಬಳಕೆದಾರರಿಗೆ ಸರ್ಕಾರದಿಂದ ಯಾವುದೇ ಸಬ್ಸಿಡಿ ದೊರೆಯುವುದಿಲ್ಲ. ಅವರು ಮಾರುಕಟ್ಟೆಯ ಚಾಲ್ತಿ ದರವನ್ನು ಪಾವತಿಸಿ, ಲಭ್ಯತೆಗೆ ಅನುಗುಣವಾಗಿ 5 ಕೆಜಿ ಅಥವಾ 10 ಕೆಜಿ ತೂಕದ ಸಿಲಿಂಡರ್ಗಳನ್ನು ಮಾತ್ರ ಪಡೆದುಕೊಳ್ಳಲು ಅವಕಾಶವಿರುತ್ತದೆ.
ಸತತ ವಿಸ್ತರಣೆ ಮತ್ತು ದೇಶವ್ಯಾಪಿ ಪ್ರಚಾರ
ಗ್ರಾಮೀಣ ಹಾಗೂ ನಗರ ಪ್ರದೇಶಗಳ ಎಲ್ಲ ನಾಗರಿಕರಿಗೂ ಮಾಹಿತಿ ತಲುಪಿಸಲು ಸರ್ಕಾರ ಆರಂಭದಿಂದಲೂ ಕಾಲಾವಕಾಶ ನೀಡುತ್ತಾ ಬಂದಿದೆ. ಮೊದಲು 2026ರ ಜೂನ್ 30 ರವರೆಗೆ ನೀಡಲಾಗಿದ್ದ ಗಡುವನ್ನು ಹಂತಹಂತವಾಗಿ ಜುಲೈ 31, ಆಗಸ್ಟ್ 7, ಆಗಸ್ಟ್ 15, ಆಗಸ್ಟ್ 23, ಆಗಸ್ಟ್ 31, ಸೆಪ್ಟೆಂಬರ್ 7 ಹಾಗೂ ಸೆಪ್ಟೆಂಬರ್ 14 ರವರೆಗೆ ವಿಸ್ತರಿಸಲಾಗಿತ್ತು. ಜೊತೆಗೆ, 2023ರ ಅಕ್ಟೋಬರ್ನಿಂದಲೇ ಸಾರ್ವಜನಿಕ ಸ್ವಾಮ್ಯದ ತೈಲ ಸಂಸ್ಥೆಗಳು 12 ಕೋಟಿಗೂ ಹೆಚ್ಚು ಎಸ್ಎಂಎಸ್ ಮತ್ತು ವಾಟ್ಸಾಪ್ ಎಚ್ಚರಿಕೆಗಳನ್ನು ಕಳುಹಿಸಿದ್ದು, ಮನೆ-ಮನೆ ಭೇಟಿ ಹಾಗೂ ಸಾರ್ವಜನಿಕ ಸ್ಥಳಗಳಲ್ಲಿ ಶಿಬಿರಗಳನ್ನು ನಡೆಸಿ ಜಾಗೃತಿ ಮೂಡಿಸಿವೆ.
ಬೃಹತ್ ಆರ್ಥಿಕ ನಷ್ಟ ನಿಯಂತ್ರಣಕ್ಕೆ ಅನಿವಾರ್ಯ ಹೆಜ್ಜೆ
ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ಮತ್ತು ಅನಿಲದ ದರ ಗಗನಕ್ಕೇರುತ್ತಿದ್ದರೂ, ಜನಸಾಮಾನ್ಯರಿಗೆ ಹೊರೆಯಾಗದಂತೆ ರಿಯಾಯಿತಿ ದರದಲ್ಲೇ ಸಿಲಿಂಡರ್ ಪೂರೈಸಲಾಗುತ್ತಿದೆ. 14.2 ಕೆಜಿಯ ಪ್ರತಿಯೊಂದು ಸಿಲಿಂಡರ್ ಮೇಲಿನ ಪರೋಕ್ಷ ಸಬ್ಸಿಡಿ ವೆಚ್ಚವು 2026ರ ಜೂನ್ನಲ್ಲಿ ಗರಿಷ್ಠ 721 ರೂಪಾಯಿಗೆ ಮುಟ್ಟಿತ್ತು, ಸದ್ಯ ಸೆಪ್ಟೆಂಬರ್ನಲ್ಲಿ ಇದು 210 ರೂಪಾಯಿಯಷ್ಟಿದೆ. ತೈಲ ಕಂಪನಿಗಳ ನಷ್ಟ ಸರಿದೂಗಿಸಲು ಕೇಂದ್ರ ಸರ್ಕಾರ 2022-23ರಲ್ಲಿ 22,000 ಕೋಟಿ ರೂ. ಮತ್ತು 2025-26 ಹಾಗೂ 2026-27ರ ಅವಧಿಗೆ ಒಟ್ಟು 30,000 ಕೋಟಿ ರೂ. ಪರಿಹಾರ ನೀಡಿದೆ. ಆದಾಗ್ಯೂ, ಗೃಹಬಳಕೆಯ ಎಲ್ಪಿಜಿಯಿಂದಾಗಿ ತೈಲ ಮಾರಾಟ ಕಂಪನಿಗಳಿಗೆ ಆಗಿರುವ ನಷ್ಟದ ಮೊತ್ತವು 2026ರ ಆಗಸ್ಟ್ 31 ರ ವೇಳೆಗೆ ಬರೊಬ್ಬರಿ 62,000 ಕೋಟಿ ರೂಪಾಯಿ ದಾಟಿದೆ. ಈ ಹಿನ್ನೆಲೆಯಲ್ಲಿ ಸಬ್ಸಿಡಿ ಸೋರಿಕೆಗೆ ಕಡಿವಾಣ ಹಾಕುವುದು ಆರ್ಥಿಕವಾಗಿ ಅತ್ಯಗತ್ಯವಾಗಿದೆ.
ಬಯೋಮೆಟ್ರಿಕ್ ಆಧಾರ್ ಪರಿಶೀಲನೆಗೆ ಸಂಬಂಧಿಸಿದ ಯಾವುದೇ ಸಹಾಯ ಅಥವಾ ಮಾಹಿತಿ ಪಡೆಯಲು ಗ್ರಾಹಕರು ರಾಷ್ಟ್ರೀಯ ಉಚಿತ ಸಹಾಯವಾಣಿ ಸಂಖ್ಯೆ 1800 2333 555 ಅನ್ನು ಸಂಪರ್ಕಿಸಬಹುದಾಗಿದೆ.
