ಆಗಸ್ಟ್ 29. ಭಾರತದ ಕ್ರೀಡಾ ಇತಿಹಾಸದಲ್ಲಿ ಅತ್ಯಂತ ಪವಿತ್ರವಾದ ದಿನ. ಇಂದು ನಮ್ಮ ರಾಷ್ಟ್ರೀಯ ಕ್ರೀಡೆಯಾದ ಹಾಕಿಯ ದಂತಕಥೆ, ಹಾಕಿಯ ಮಾಂತ್ರಿಕ ಮೇಜರ್ ಧ್ಯಾನ್ ಚಂದ್ ಅವರ ಜನ್ಮದಿನ. ಅವರ ಗೌರವಾರ್ಥವಾಗಿ ಇಡೀ ದೇಶವೇ ಇಂದು ರಾಷ್ಟ್ರೀಯ ಕ್ರೀಡಾ ದಿನವನ್ನಾಗಿ ಆಚರಿಸುತ್ತಿದೆ.
ಧ್ಯಾನ್ ಚಂದ್ ಅವರು 1905ರ ಆಗಸ್ಟ್ 29ರಂದು ಅಲಹಾಬಾದ್ ನಲ್ಲಿ ಜನಿಸಿದರು. ಅವರ ತಂದೆ ಸೋಮೇಶ್ವರ್ ಸಿಂಗ್ ಬ್ರಿಟಿಷ್ ಭಾರತೀಯ ಸೇನೆಯಲ್ಲಿ ಇದ್ದರು. ಬಾಲ್ಯದಿಂದಲೂ ಧ್ಯಾನ್ ಚಂದ್ ಗೆ ಹಾಕಿ ಎಂದರೆ ಅಚ್ಚುಮೆಚ್ಚು. ಅವರ ಆಟವನ್ನು ನೋಡಿದವರು ಅವರ ಸ್ಟಿಕ್ ಗೆ ಚೆಂಡು ಅಂಟಿಕೊಂಡಿದೆ ಎಂದೇ ಭಾವಿಸುತ್ತಿದ್ದರು. ಅದಕ್ಕಾಗಿಯೇ ಅವರನ್ನು ಜಗತ್ತು “ಹಾಕಿ ವಿಜಾರ್ಡ್” ಎಂದು ಕರೆಯಿತು.
ಧ್ಯಾನ್ ಚಂದ್ ಅವರ ಸಾಧನೆ ಅಸಾಮಾನ್ಯವಾದುದು. ಅವರು ಭಾರತಕ್ಕೆ ಸತತ ಮೂರು ಬಾರಿ ಒಲಿಂಪಿಕ್ಸ್ ನಲ್ಲಿ ಚಿನ್ನದ ಪದಕ ಗೆದ್ದುಕೊಟ್ಟಿದ್ದಾರೆ. 1928ರ ಆಮ್ಸ್ಟರ್ ಡ್ಯಾಮ್ ಒಲಿಂಪಿಕ್ಸ್, 1932ರ ಲಾಸ್ ಏಂಜಲೀಸ್ ಒಲಿಂಪಿಕ್ಸ್ ಮತ್ತು 1936ರ ಬರ್ಲಿನ್ ಒಲಿಂಪಿಕ್ಸ್ ನಲ್ಲಿ ಭಾರತದ ಹಾಕಿ ತಂಡದ ನಾಯಕರಾಗಿ ಇತಿಹಾಸ ಸೃಷ್ಟಿಸಿದರು.
1936ರ ಬರ್ಲಿನ್ ಒಲಿಂಪಿಕ್ಸ್ ನ ಕಥೆ ಇಂದಿಗೂ ರೋಮಾಂಚನಗೊಳಿಸುತ್ತದೆ. ಫೈನಲ್ ಪಂದ್ಯದಲ್ಲಿ ಭಾರತ ಜರ್ಮನಿಯನ್ನು 8-1 ಅಂತರದಿಂದ ಸೋಲಿಸಿತು. ಆ ಪಂದ್ಯವನ್ನು ನೋಡಲು ಬಂದಿದ್ದ ಸರ್ವಾಧಿಕಾರಿ ಅಡಾಲ್ಫ್ ಹಿಟ್ಲರ್ ಕೂಡ ಧ್ಯಾನ್ ಚಂದ್ ಅವರ ಆಟಕ್ಕೆ ಮಂತ್ರಮುಗ್ಧನಾಗಿ ಅವರಿಗೆ ಜರ್ಮನ್ ಸೇನೆಯಲ್ಲಿ ಉನ್ನತ ಹುದ್ದೆಯ ಆಫರ್ ನೀಡಿದ್ದನಂತೆ. ಆದರೆ ದೇಶಭಕ್ತ ಧ್ಯಾನ್ ಚಂದ್ ಅದನ್ನು ತಿರಸ್ಕರಿಸಿ ಭಾರತದಲ್ಲೇ ಉಳಿದರು. ಇದು ಅವರ ದೇಶಪ್ರೇಮಕ್ಕೆ ಸಾಕ್ಷಿ.
ಒಮ್ಮೆ ಅವರ ಹಾಕಿ ಸ್ಟಿಕ್ ನಲ್ಲಿ ಅಂಟು ಇದೆಯೇ ಎಂದು ಅನುಮಾನಗೊಂಡು ಅದನ್ನು ಮುರಿದು ಪರಿಶೀಲಿಸಲಾಯಿತು ಎಂಬ ಕಥೆಯೂ ಇದೆ. ಅವರ ಚೆಂಡಿನ ಮೇಲಿನ ನಿಯಂತ್ರಣ ಅಷ್ಟೊಂದು ಅದ್ಭುತವಾಗಿತ್ತು. ಅವರು ತಮ್ಮ ವೃತ್ತಿ ಜೀವನದಲ್ಲಿ 1000ಕ್ಕೂ ಹೆಚ್ಚು ಗೋಲ್ ಗಳನ್ನು ಗಳಿಸಿದ್ದಾರೆ ಎಂದು ಅಂದಾಜಿಸಲಾಗಿದೆ.
ಧ್ಯಾನ್ ಚಂದ್ ಅವರು ಕೇವಲ ಆಟಗಾರರಾಗಿರಲಿಲ್ಲ, ಅವರು ಸ್ಫೂರ್ತಿಯ ಸೆಲೆಯಾಗಿದ್ದರು. 1956ರಲ್ಲಿ ಭಾರತ ಸರ್ಕಾರ ಅವರಿಗೆ ಪದ್ಮಭೂಷಣ ಪ್ರಶಸ್ತಿ ನೀಡಿ ಗೌರವಿಸಿತು. ಅವರ ಮರಣದ ನಂತರ ಭಾರತದ ಅತ್ಯುನ್ನತ ಕ್ರೀಡಾ ಪ್ರಶಸ್ತಿಗೆ ಅವರ ಹೆಸರನ್ನೇ ಇಡಲಾಗಿದೆ – ಮೇಜರ್ ಧ್ಯಾನ್ ಚಂದ್ ಖೇಲ್ ರತ್ನ ಪ್ರಶಸ್ತಿ.
ಇಂದು ರಾಷ್ಟ್ರೀಯ ಕ್ರೀಡಾ ದಿನದಂದು ನಾವು ಅವರನ್ನು ನೆನೆಯುವುದು ಕೇವಲ ಒಂದು ಆಚರಣೆಯಲ್ಲ. ಇದು ನಮ್ಮ ಯುವ ಜನಾಂಗಕ್ಕೆ ಕ್ರೀಡೆಯ ಮಹತ್ವವನ್ನು ತಿಳಿಸುವ ದಿನ. ಕ್ರೀಡೆ ನಮ್ಮಲ್ಲಿ ಶಿಸ್ತು, ತಂಡದ ಮನೋಭಾವ, ಸೋಲು-ಗೆಲುವನ್ನು ಸಮಾನವಾಗಿ ಸ್ವೀಕರಿಸುವ ಗುಣವನ್ನು ಕಲಿಸುತ್ತದೆ.
ಕ್ರಿಕೆಟ್, ಕುಸ್ತಿ, ಬ್ಯಾಡ್ಮಿಂಟನ್, ಶೂಟಿಂಗ್, ವೇಟ್ ಲಿಫ್ಟಿಂಗ್, ಚೆಸ್ ನಂತಹ ಎಲ್ಲಾ ಕ್ರೀಡೆಗಳಲ್ಲೂ ಇಂದು ಭಾರತ ಮುನ್ನುಗ್ಗುತ್ತಿದೆ. ಈ ಎಲ್ಲಾ ಸಾಧನೆಗಳಿಗೆ ಮೂಲ ಸ್ಫೂರ್ತಿ ಧ್ಯಾನ್ ಚಂದ್ ಅವರಂತಹ ದಿಗ್ಗಜರು ಹಾಕಿಕೊಟ್ಟ ಅಡಿಪಾಯವಾಗಿದೆ.
ಸಮರ್ಪಣ ಟ್ರಸ್ಟ್ ಹಾಕಿಯ ಮಾಂತ್ರಿಕ ಮೇಜರ್ ಧ್ಯಾನ ಚಂದ್ ರವರ ಜನ್ಮ ದಿನ ಆಚರಿಸಿ ಈ ರಾಷ್ಟ್ರೀಯ ಕ್ರೀಡಾ ದಿನದಂದು ನಾವು ಪ್ರತಿಜ್ಞೆ ಮಾಡೋಣ. ಪ್ರತಿದಿನ ಕನಿಷ್ಠ ಒಂದು ಗಂಟೆ ಕ್ರೀಡೆಗಾಗಿ ಮೀಸಲಿಡೋಣ. ನಮ್ಮ ಮಕ್ಕಳಲ್ಲಿ ಮೊಬೈಲ್ ಗೀಳಿಗಿಂತ ಮೈದಾನದ ಪ್ರೀತಿ ಹೆಚ್ಚಿಸೋಣ. ಅದೇ ನಾವು ಧ್ಯಾನ್ ಚಂದ್ ಅವರಿಗೆ ಸಲ್ಲಿಸುವ ನಿಜವಾದ ಗೌರವ.ಎಂದು ಸಮರ್ಪಣ ಟ್ರಸ್ಟಿನ ಅಧ್ಯಕ್ಷ ಕೆ ಎಸ್ ಜಯಶಂಕರ್ ಹೇಳಿದರು.
